نناطح الصعبات – الشيلات

قالولي ان ما طاعك الوقت طيعه
واقول ان هذا المثل للضعيفين

حنا انخلقنا بس فينا طبيعه
نناطح الصعبات لين انها تلين

حتى لو ان ضاقت علينا الوسيعه
يضيق باب ويفتح الله بابين

عاداتنا دايم نحب الطليعه
وانموت ما نرضى نكون الاخيرين

واللي شرانا للزمن ما نبيعه
ونوقف معْه باليسر والعسر والدِين

واللي يدور للفراق الذريعه
نعطيه فوق فراقنا علمنا الزين

صدورنا مثل السدود المنيعه
ما نشتكي لو كان شفنا الأمرّين

ورجولنا لدرب المراجل سريعه
ونتعب على قولة كفو وحي هالعين

وقولة ( نِعِم ) ربيع منهو ربيعه
لكن غايتنا على ال نِعْم نِعمين

نَكرَم عن وجيه الذكور الوضيعه
ونتعب على وجيه الرجال المسمين

اللي يحب الله يحب الشريعه
واللي يحب الوقت يلقا المساكين

وإن قالوا ( إن ماطاعك الوقت طيعه ) ؟
بقول : ربي ما خلقنا ضعيفين

0

كلمات: محمد الصواغ

2016