لو نويت تروح – باسم الكربلائي

لو نويت اتروح
گلبي وين ايروح
لوصدگ لاسامح الله وفارگتني
يالوداعك آه
اسألك بالله
زينب آني لوجبل واگف شفتني
مع السلامه لو گلت
احسبني من باچر متت
لونويت اتروح

لقائي ولقائك سكته بي كولشي حچينه
فهمنه بعضنه بالدمع لمن بچينه
گلت لك قريبة اخيولهم صارت علينه
گلت لي وعد مكتوب ياخوية اشبدينه
صرت اشوف الليل
چن سنابك خيل
تسحگ ابصدري وتفوت الساعه لحظه

تمشي ليل الموت
اسرع من الصوت
ليلة وداع الحبايب چنها ومضه
ياموتي ليش استعجلت
احسبني من باچر متت
لونويت اتروح

وگفنه ابوداعك والزمن ويانه واگف
ورجفنه ورجف حته الكلام اعله الشفايف
صباحاً گلتلي تنچفي ادلال المضايف
وسألتك يخويه اب يامتن للسوط اشاگف
واسمع من الغير
مو صباح الخير
شامت ايگلي البقيه في حياتج
وعرشي راح وياك
واسمع ابلياك
عرشج الهزله الاميره مو صفاتج
واني أميرتهم چنت
احسبني من باچر متت
لو نويت اتروح

سكتنه يخويه وجرحك ايسولف واسمعه
يگلي نهارچ مو سهل حضريله دمعه
امن اشوفك صدر والخيل والدنيه اعله ضلعه
وحقك آنه والخيمه نوگع فرد وگعه
وتوگع اسنيني
دمعه من عيني
حزنك ايلفني جرح فوگا عبايه

لا على بختك
لا يبعد اختك
مايلوگ ويه الخدر ثوب السبايه
وبجالك آني ادللت
احسبني من باچر متت
لونويت اتروح

احاول يخويه وما يصح بيدي وامنعك
ولا اني مقاتل حته للميدان اتبعك
منونك اقدمه اشلون تقبلها وأودعك
وأنه ادري جوادك ياخذك بس مايرجعك

من گلت رايح
مني شي طايح
دورت گلبي ولگيته مني واگع
والله ما أدري
احترگ صَدري
لوهذا دخُان الخيم من صدري طالع
حته بكلامي اتعثرت
احسبني من باچر متت
لونويت اتروح

منيتي ومنيتك باچر اتشاهدها عيني
شمرهم يذبحك وآني يذبحني حنيني
واشوفك تگوم وتعثر اتحاول تجيني
صوارم وأسنه ونار مابينك وبيني
انته زينب وين
واني وين حسين
باچر انردد سوه لحظة منيه

واختك اتعاتب
ونحرك ايجاوب
انذبح شاء القدر وانتي سبيه
ما اعرف اني اشجاوبت
احسبني من باچر متت
لونويت اتروح

اسألك يخويه وخايفه بس لا اعذبك
دگلي ابمكاني لوصرت شيسوي گلبك
اعاين واعدد للشمر كلما يضربك
واشوفه يجر سيفه وعلى وجهك يگلبك

يرفس ابظهرك
من يحز نحرك
قل هو الله احد دمعتها تجري
تصرخ اجروحي
والصدى بروحي
عوف اخويه وهاي آنه وإگطعلي نحري
ماچنه يسمع من صحت
احسبني من باچر متت
لونويت اتروح

كلمات: احمد الذهبي

2018