القدر جابك – بندر بن عوير

لا تساورك الظنون ولا تساورك الطواري
عادك أغلى من عشقت وعادك الحب المبدّى
وعادك اللي كل ما هب الهوا والليل ساري
أذكرك وإذا ذكرتك سال غيم و ورّد ندّى

في غيابك ملتهب قلبي على جمر إنتظاري
والحزن إن ما تعشى من قفص صدري تغدى
ذي طيوفك من يميني و ذي طيوفك من يساري
تطرق ف باب الطواري طيف جاب و طيف ودا

والله إني في محيا وجهك الطاهر أماري
وكل زين يمرني عقبك امره واتعدى
في محطات العمر ما كنت من ضمن اختياري
القدر جابك وأنا ممنون للأقدار جدا

ياحبيبي وأغلب العشاق من بايع و شاري
يوم أنا من كثر ماني واثقٍ فيك أتحدى
أنت مثل الحاكم اللي دون شعبه نهر جاري
و أنا مثل الصامل اللي دون حاكمه يتفدّى

2020