أنا والبواخر – حسين الجسمي

يْحِن خفّاقي لا شفت البواخر
تعدّت الشاطي وغابت في الأمواج
تبحث على لؤلؤ طبيعي وْفاخر
يزهي نحَر من هو يحب التغنّاج

والعود الازرق لا احترق في المباخر
ما يشبه الاّ ريحه العَذب لا فاج
واليوم ينظر لي بْمنظور ساخر
كنّه يريد يْسبّب لْقبي احراج

ياللي بدا وصلك معاي يتباخر
لا ترتجي من صاحبك ضحكة حْجاج
سوس الهجر في عظم الاشواق ناخر
والحزن في روض المحبّين دوّاج

من التغطرس والكبر والتفاخر
ما جبت لجروحي من فْراقك علاج
على كثر ما كنت يا زين ذاخر
في مملكة قلبي لك العرش والتاج

من قلب بالشيمه وبالعزم زاخر
اقفيت وآنا عالي مثل الابراج
والله لو انّك أوّل انسان وآخر
انسان ماحتاجك ولو كنت محتاج

كلمات: فزاع

ألحان: فايز السعيد