
الرزق عند الله
كلمات قصيدة الرزق عند الله - عبدالعزيز المشيعلي
شاعر ولا اغني على كل موضوع
قريحتي ما كل دافع دفعها
والشاعر المطبوع ماهوب مصنوع
قريحة المطبوع ما يصطنعها
وللبنك فرع رييسي واربع فروع
ومراجعينه بالفوايد نفعها
واليا انتهى مشروع يبدا بمشروع
على شريعة ربه اللي شرعها
واللي يقول ان القلم عنه مرفوع
البنك عنه اليوم نفسه رفعها
مالي ومال ملاوقة كل مصروع
اللي علومه بالظلايم بدعها
في غيبتي يقول بيلوعني لوع
يقول حتى هيبته بانتزعها
ولا شافني جيته جحر تقل جربوع
ولغير ربي هامتي ما اخضعها
والرزق عند الله محدٍ ميتٍ جوع
ان ما منعه الله محدٍ منعها
حبل الرجا بالله ماهو مقطوع
ياويل من بالله حباله قطعها
وحبل الشقى يارقيب مثني ومربوع
ولا كل من يثني حباله ربعها
عسى عدوك لا اعتزى ماله فزوع
والله ان تنزل هامته لو رفعها
ابعد عليه العز من حبة الكوع
مايهتني في لقمته لو بلعها
ودنياك ما دامت لطامع ومطموع
واهل الجشع يقضي عليها جشعها
والرفقة الي ما تدلك لمنفوع
بعها برجو الله يا رقيب بعها
كم عاصين دنياك يمشيلها طوع
وان كان ما طاعتك الايام طعها
ولا كل من يهرج من الناس مسموع
بعض العلوم تضيع اللي سمعها
تجي الهروج العوج من كل كرسوع
واللي يشق شقوقها ما رقعها
بالهرج هرج العوج لازم يتوع
له ترعة ما تنرقع لا ترعها
كٍل وما قدم حصد كل مزروع
وكل يحصد البذرة اللي زرعها
والله من قلب من الوقت مفجوع
والله من نفس تزايد وجعها
وقت عطاني من سماريه قرطوع
واخلف هوا نفسي وخالف سنعها
متغير حالي من اسبوع لاسبوع
والناس كني كاره مجتمعها
بلا شعور اجلس مع الناس وافوع
واكتم جزع نفسٱ تزايد جزعها
فقدت لي حرٍ على الصيد باتوع
و الارض عقبه ضاق بيا متسعها
ما كني الا اللي على الوجه ملفوع
اقدار والاقدار ما حدا منعها
الشايب الي يعتبر نادر طبوع
الشايب الي هامته ما خضعها
عز الرفاقه والعدى لاعهم لوع
اعداه في نظرة عيونه سبعها
لا شفته يجيني مع ضلوعي ضلوع
واليا تهقوت بي عدايا ردعها
عساه بالجنه منزّه وموضوع
اللأنبياء والرسل جعله تبعها