الطلقه في بنته ريناد – مساعد الرشيدي

من ابوك ؟ مساعد ابوك يا الطلقه
انتي الريناد مانتي رونديه

بنت من غنّوا على قافه اوطرقه
النوارس و المدارس بناديه

المسا كيفه يجي صبح من حقه
وان بغى عرضه ودبكه و رديّه

من زمان ما زما الجهل و البرقه
ورقحوا مثل الجراد التهاميّه

الكمخ في نفسها ماخذه علقه
غرّها تبني بويتات محميّه

يا المهمهم والرعد يسبقه برقه
لا ترزّم جاك يدوي شماليّه

مادريت انه ثنى السيف والطلقه
مادريت انه دوى السم في الحيّه

بنت يا ريناد يا شيخة الحلقه
إنشدي العربان بدوٍ وشاويّه

عن ابوك الخيل، والخير و الرفقه
والنعم والفين نعمٍ رشايديه

ريع القلب – مساعد الرشيدي

كلما جيت أبدله عن وصالك وأسفه العشق كله كلما​
​ريع القلب في محني ظلالك والتوى بي شوق قلبي وأرتمى​

وكل ماقلت أبروى من زلالك لازم أحيا وأموت من الضما​
​برقي بالنحيل اللي قبالك يابعد كل عذبات اللمى​

وأحلمي بس لا يشطح خيالك من عيونك ليا حد السما​
​وألا أنا فوق ضنك وأحتمالك قبل لاتحلمين وبعدما​

شمس عابد – مساعد الرشيدي

ياسلامي على اللي للوطن برهن
قو باس الرشيدي ساعة الواجب

شمس عابد تجلت والظلام أرعن
والمدايح لابن داموك تستاجب

أرتكى للدخيل وجندل المقرن
حطها بين رمش العين والحاجب

السوالف بليا فعل ماتسمن
ودايم العين ماتعلى على الحاجب

ياولد عبس لاقال الوطن شكرا
قل فديناك لاشكرا على واجب

مثل المستحيل – مساعد الرشيدي

أخر عباراتي وداع وأخر مشاويري رحيل
جيتك وبي لفحة ضما وأقفيت كبدي ناشفه

أصعب كلام أصعب خبر صرخه عقب صمت طويل
مثل الهدوء اللي سبق لحظة هبوب العاصفه

وأنتي بمتناول يدي تبدين مثل المستحيل
في عشرتك صوت العقل يقتل طموح العاطفه

الحب ماهوى كل شي اليا وقف حظ بخيل
قلوبنا مثل العسل بس الظروف مخالفه

لا للندم لا للعتب أوشي من هذا القبيل
وأنتي ماجا منك خطا حتى تقولي أسفه

من غير ليه أستسلمي وأستلهمي صبر جميل
ولا تسألني وش جرى مالك بطول السالفه

قولي لهم ياعزوتي ماعبنا موت النخيل
اللي يوافيها الأجل وتموت لكن واقفه

أخر عباراتي وداع أخر مشاويري رحيل
جيتك وكبدي ناشفه وأقفيت كبدي ناشفه

العبسية – مساعد الرشيدي

أدخل على الله وأسلم الأمر تسليم
وأستغفره وأستذكره وأستميحه
وضح النوايا والمساري مجاهيم
والحلم غالي والليالي شحيحه

سادت مفاهيم وبادت مفاهيم
ويح الزمن يابنت الأجواد ويحه
خلي علوم ممسسين المرازيم
وأخذي علوم مصمصين القريحه

حنا سلايل عبس يامذير الريم
حنا مقابيس الوغى يامليحه
حنا سلايل قاسم الخيل ودليم
فزعاتنا يوم المكايد رجيحه

بدو حفايا ما أنصفتنا المقاسيم
وبصدورنا عز تطارخ فحيحه
نرعى رفيف البرق في ساقة الغيم
ومن يستبيح حدودنا مانبيحه

وليا ترع في هرجته دفش وبهيم
خطو الهبود اللي تكابر فطيحه
عن ساقط الهرجه نطق الملاطيم
ومن طاح فيها مارحمنا مطيحه

نكبر عن الطفسه ونجزع من الضيم
ونموت ماناطا شليل الفضيحه
نزوم زومات الرجال المحاشيم
ونهد هدات النمور الجريحه

ربع على در المنايا مفاطيم
ومن هازنا زاغت عجوزه تصيحه
أليا تغشلينا عسير الشغاميم
لومك على اللي مايبرهن مديحه

وأن لولشن محشمات الملاثيم
والموت حثرب بالحناجر ضبيحه
جينا من أقصانا سحاب مراديم
كل يذكي حروته عن نطيحه

يازين دح قفوشنا له ترانيم
والعج واقف والفعايل صريحه
كان المنايا سوقها مابعد سيم
والخوف برك بالقلوب الكسيحه

حنا زباينها علي الملازيم
علم يقريه النصيحه لنصيحه
واللي بنى بيته نبيه أبراهيم
إنا طريق المستميت لضريحه

بني رشيد إن عتم الجو تعتيم
ماللردى فينا ملامح وليحه
خوينا نقريه عزه وتحشيم
دخيلنا دونه عن الموت صيحه

يابنت ماحنا فقارى معاديم
ولو ماسكنا بالقصور الفسيحه
تجار لو حاشت يدينا ملاليم
ومن الغناه نفوسنا مستريحه

مانستضيق اليا لفونا معازيم
للضيف لو نذبح حدينا ذبيحه
دايم يدينا للعطايا مواليم
لاخانت الفزعه وجيه كليحه

طال القريض ومقبل الود ومقيم
والبال عيا طارقه لايريحه
أقولها وأبصم على القول تبصيم
والعلم بين زايفه من صحيحه

ماهو قصور بالحرار الصماصيم
كل بدرب العز قد هب ريحه
مدحي لربعي مايذم الأكاريم
ولايستشك الا خبيث الشريحه

الحق واضح للرجال المفاهيم
والحقد يخرث بالنفوس القبيحه
والشر من جيت معزي وهو نيم
واليوم وحده والشريعه سميحه

ياطير – مساعد الرشيدي

حزين من الشتا ياطير والا حزين من الظما ياطير
دخيل الريشتين اللي تضفك حل عن عيني
دخيل الما وملح الما وحزن الما قبل ماتطير
تهيا للهبوب اللي تصافق في شراييني

دخيل الغصن والظل الهزيل وهفهفات إعصير
دخيلك لاتشح بنجمتي والليل ممسيني
ترفرف يارفيق الريش ضيقه والنهار قصير
علامك كل ماليل جناحك جيت ساريني

انا ماني بخير وجيت يمي وانت مانت بخير
وانا ياطير في من الجهاد اللي يكفيني
ترى لو شفت لي ظل ومهابه في عيون الغير
ترى كل الزهاب اللي معي جرحي وسكيني

انتي نسيتي – مساعد الرشيدي

انتي نسيتي وكيف انا ما انسى
حتى لو كنتي السنين اللي راحت
مقدر احبك
حتى ولو كنتي الحنين اللي في جراحك

مقدر انا قربك
انتي نسيتي وكيف انا ما انسى
انتي قسيتي وكيف انا ما اقسى
ياصدى من غير صوت

مابه حياه من غير موت
لوتدرين وش انا منه خايف
ان باقي لك من الذكرى حسايف
اخاف شوق الأمل

واخاف ذكرى القلم
اخاف يحكي السطر والورق
اخاف يشكي الشقا والارق
ياصدى من غير صوت

مابه حياه من غير موت
ياذكرى الصحاري والجفاف
ياياسي اللي باقي واللي طاف
ماعاد شي يربطني فيك

غير الشقا ان كان يرضيك
حتى السنين اللي عطت
وحتى الدموع اللي بغت
صارت تخاف

هبت شمال – مساعد الرشيدي

هبت شمال وساقت الوبل هتان
قالوا روى قلب العطش قلت لله
توه يبل الريق من ريق الأمزان
قلب تفيا غيمة مسفهله

ودي تفيض بفاتر الصوت غدران
المطر يرفا عن الكبد عله
حي الغلا بشفاك ياعطر الاشجان
قل للغرير اللي نهى القلب قله

طاح الربيع ووردت جرد الاغصان
عشب القلوب مصافح الخل خله
نش السراب وحادي الغيم نشوان
هيض غناه معانق الورد طله

من فرحتك شابت نواطير الاحلام
وبجيتك خان اسود الهم ظله
هج الظلام وسال في حجر الاعيان
ضي تزفه غرة مسفهله

لك من هنا لأخر تفاصيل الازمان
عشق تمده راحة ماتمله
واليا لفحك القيظ بأطراف الاجفان
خذ نصف قلبي لا خذ القلب كله

لاتستذير معاند الشوق غلطان
الله عطاك امر الخفوق وتوله
احيان اسوق العمر وتسوقه احيان
بيني وبينك دق عمري وجله

نمسي على جال المقادير خلان
نصبح ومرباع الغلا في محله
ماعاتبك لوساهي الرمش كسلان
القا العزا بمزاح شعر تفله

هاك القصيد تفجر العشق بركان
خذ من سنهاه وبارد الحرف خله
ياعل شعر منت قافه والاوزان
تصدا عليه شهورهن والأهله

اربع سنين – مساعد الرشيدي

بعد الفراق اربع سنين عمر اللقا لمحة بصر
مريت جنبه والتفت صدفه بنظرها لامحه

احترت واحتار القدم بين الهزيمه والنصر
اكلمه ما اكلمه ماشفت فرصه سانحه

ويلاااه انا وش جابني من يم منحول الخصر
اكيد هو مثلي يعد اللي ذبحني ذابحه

فرقا حكم فيها القدر لوكان نرفضها ونصر
فرقا نهار اليوم عن يوم امس هو والبارحه

انهار دجله والفرات النيل في ديرة مصر
ماضنتي تطفي لهايب شوق قلبن جارحه

بغى يطيب الجرح لكن جدده امس العصر
في ثانيه إنهار صبر اربع سنين كالحه

حايل – مساعد الرشيدي

حايل سقى حايل من الوبل هتان
وسم يليق بنفدها والنجايد
بالله عليكم بلغوها يالأخوان

مني سلام وعايدوها معايد
ومن بعد حاتم بشروها بسلطان
بشركم الله بالفرح والسعايد

حيا نباه بدار ذربين الأيمان
ساس الكرم واهل الكرم والعوايد
حايل تشوش إن شرف الدار ضيفان

سلم لأهلها من قديم وجدايد
غيدا سما واميرها طير حوران
نسل الملوك موحدين العقايد

لجبالها هيبه مشاكيل وازمان
تقاسموها بالرخا والنكايد
ولخبتها سحر وتباريح واشجان
قول ينقص سحرها ويتزايد

z