من رياض المجد – خالد الفيصل
من رياض المجد لامجاد الكويت … من ثبات العلم للعلم الثبات
جيت أصافح بالتّهاني كل بيت … للشّهيد الخلد والحي الحياه
فوق غيمة شوق من أبها مشيت … من نداها فزّت الصّحرا نبات
سيّرتني نشوة الحب وسريت … للكويت الّلي هويت أكتب غناة
في غناتي للشّرف صوت وصيت … ومن غناتي يرفع الفارس حداة
وللكرامة عرضة في كل بيت … والسجايا بالشهامه نايفات
ياالكويت الّلي على الباغي عصيت … يوم بعض الرّبع ينسى المكرمات
يوم بان الغدر قلنا له خسيت … كل شيطان رجمناه بحصاه
دارت الدنيا عليهم واعتليت … وانهزم جيش النّفوس الخاينات
يالفهد عند الوعد قلت ووفيت … طاغيات الرّوس عادت صاغرات
مااختلفت ولاذخرت ولاشكيت … شامخ مثل الجبال الراسيات
دلّك الله يالسنافي واهتديت … والنّصر من عند رب الكاينات
مايغط الحق رجال بخيت … مانسينا يالكويت السابقات
يوم عز بدارنا حلو المبيت … إستضفتونا زمان النّايبات
لين ابو تركي ظهر من فوق هيت … واصطفق من نجد لجبال السّراه
يرفع القرآن والسيف الصليت … واسترد الحكم من عقب الفوات
ياالصّباح وياالسعودي لى انتخيت … عزوتك عنّاز راعي الطّايلات
ويالامير الّلي على العليا نشيت … جابر العثرات محمود الصفات
في بلادك كل تكريم لقيت … والنشامى ماكتفوا بالواجبات
بالكويت أعطاني الشعر وعطيت … وبالكويت الشعر له طعم وحلاة