قصيدة اجمل حظ سيــئ – سعد علوش

اجمل حظ سيــئ

با ارجل وباتي . إذاني اقدر آتي
بس آخاف ارحل ولا عاد اقدر آتي

لأن هذا حظي ، وهذي صدوفه
يكره استقراري ويغلي اشتاتي

وعاد عقلي كل ماجيت اتشتت
يحسب اشتاتي على قدر امنياتي

والبلا . ان كل ماعقلي تمنّى
ماحصل لا في اشتاتي ولا ثباتي

يمكن ان وضعي وضع سيئ ويمكن
ماتحمّل جسمي كبار اشهواتــي

والدليل ان ودّي ماارحل وشفني
اربط اشلائي بمحزم ذكرياتـي

ياحبيبي ليتني ماكنت احبّك
لاجل احبّك دبل واسوي سواتي

يعني كل شي حطّة فـ عقلك وحاته
إلا بخصوص انّي احبك . لاتحاتي

لمّني وامسح دموعك .وابتسم لي
وحبني منّا ،، ورتّب حاجيـــاتي

واعرف انّي ماودي اتكلم ولا ابكي
بس دايم دمعي يحرّك سكاتــي

شي واحد قبل لا ارحل بقولــه
انت.. اجمل حظ سيئ في حياتي