كلمات قصيدة قهر الأحرار – ناصر الفراعنة

ولّي خلوجٍ على سمرا فَمِي تِرزم … كلْ همٍّ اقفى تردّه جاي وتْعَزمه
اوّل زماني وانا همّي ثمان ارزَمّ … واتلى زماني وكلْ رزمة مِيَة رزمة
من شطّ قزوين اجاوب شاطي القلزم … واطراف ريشي بعوق سْبوق منْلزمة
يا ساق لو صيّرك حذف الطغاة احْزَمّ … غيرك عرب وانت عودٍ من عَرَضْ حِزمة
وقتٍ تمرسل قفا علباي كود ابْزم … وانا متى ما بزمت البزمة البزمة
فياللي تراني قزَم عيني تراك اقزم … ومن آهَلِك من تعوّض قربك بْكَزمة
عن موميا مصر بحثي في حصا زمزم … وعلمالجَبِر دارسٍ قبلك خوارزمه
ما احدٍ عن الشُبْط ينشد كنّة المرزم … لا قد تخاون ولا جاء بينهن لِزمة
يا سعود من كلّ ذو عزمٍ نبيك اعْزم … واحرص ماْكلْ عهدٍ بْْه اعْداك ملتزمة
وان شفت لك حازمٍ مسّ الحزام احْزم … خبلك لما تحتزم والقوم محتزمة
الحرّ يغضب والى شاف القهر يَجزِم … والعبد ما حسّته قولة:على جزمة
يا سعود من لا نِصَرْه الله يبى يهزم … وصيّور منْتَصْرِةٍ يا سعود منْهزمة
اعزم والى ما عزمت ايّاك تستعزم … خلْ ردّها في اكبرٍ ما هوب في عِزمة
ما لازم الاّ ويجيك الصبح منه الْزم … ومن آهَلِك من عدوّك شدّ به عَزمه
كم خشم لولا خشوم ربوعه بْيِِخزم … يأمن وهو يا كثر ناسٍ تبي خزمه
ما كلّ رجلٍ طعَم هرجه حلو محزم … وحلو الحكي في الشدايد ما يفكّ ازْمة
من دون قولة نِعِم سبعين مستلزم … ما استلزم الفعل في نصبه وفي جزمه